"Za
Karabax", yoxsa "Qarabağ uğrunda!"
Deyəsən,
Bakı Şampan Şərabları Zavodunun rəhbərliyi
Qarabağı top mərmisinə bənzətdiyi araqları
ilə almaq istəyir, amma...
Neçə
vaxtdır, xüsusən də işğal etdirilmiş
rayonlarımızın adını daşıyan restoran
və kafelərdə, şadlıq evlərində "Za
Karabax" adlı araq içilir
Zahiri
görkəmi ilə butulkası top mərmisinə oxşadılmış
bu arağı düzəldib ortaya qoyanların naşı
məqsədi aydındır. Guya onlar çox orijinal bir addım
atıblar. Məsələn, gecə yuxuna (guya) Şuşa
və ya Ağdamda qalmış qəbirlər düşür,
səhərə kimi yatmırsan və əl-üzünü
yuyub özünü verirsən yaxınlıqdakı
restoranlardan birinə. Sonra bir butulka "Za Karabax" arağı
sifariş verib, bala-bala Şuşanın, Ağdamın,
Kəlbəcərin, Füzulinin, Xocalının, Zəngilanın,
Qubadlının, Cəbrayılın, Ağdərənin,
Xocavəndin... sağlığına vurursan!
***
...Eşitdiyimizə
görə, Şampan Şərabları Zavodunun rəhbəri
Azərbaycanın üzdə olan güc nazirlərindən
birinin qaynıdır. Deməli, çox yaxşı!
Amma
burada heç də yaxşı olmayan bir məsələ
də var. Görünür, Bakı Şampan Şərabları
Zavodunda bu arağın istehsalına könül
verənlər və xeyir-dua alanlar fikirləşiblər ki,
Qarabağı ayıq başla və anlaqlı vicdanla
sevmək, bu sevgini ortaya qoymaq yasaqlığı var.
Məsələn, kimə sirr deyil ki, Qarabağ uğrunda döyüşüb
əlil olmuş döyüşçülər indi hansı
rəftara tuş gəlməkdədir? Qarabağ Əlillər
Cəmiyyəti üzvlərinin, "omon"çuların,
şəhid və əlil ailələrinin... taleyini hər gün
görür, rastlaşırıq. Bəlkə Qarabağ Azadlıq
Təşkilatı üzvlərinin, başda təşkilatın
sədri Akif Nağı olmaqla, Bakıya gələn
ermənilərə etirazına görə həbsini, onların
Yasamal rayon Polis İdarəsinin rəis müavini Çingiz
Məmmədov tərəfindən döyülüb, birinin
isə şalvarının əynindən çıxarılmasını
unudublar?
Heç
uzağa getməyək, mayın 8-də Şuşanın işğal
günü Şəhidlər Xiyabanında "Qarabağa
azadlıq! Ermənilərə ölüm" şüarı
qaldıran keçmiş döyüşçülər
polis zorakılığına məruz qaldılar. Yəni
ermənilərə ölüm və Qarabağa azadlıq
olmaz!!!
***
Olmaz,
deməli, omaz! Və yəqin ki, Bakı Şampan Şərabları
Zavodunun direktoru da bütün bunları nəzərə alıb.
Çünki Azərbaycanda vətəni, o cümlədən
Qarabağı ayıq baş və açıq gözlə
sevmək yasaqlığı var. Qarabağ uğrunda "Za
Karabax"- deyib döyüşə, yaxud mitinqə, piketə
gedənlərin taleyini ki, görürük. Elə isə,
deməli, Qarabağı kefli başla sevmək daha yaxşı
deyilmi? Vurursan "Za Karabax" arağını və
xəyalən olursan Şuşada, Ağdamda, Laçında...
İsa bulağının sərin suyundan içib, Xarı
bülbüldən dərib qoxlayırsan. Nə könlündən
QAT-ın piketi keçir, nə yolun Azadlıq meydanından,
nə türmədən, nə də döyüş
səngərindən.
Bir
də axı, Qarabağı ayıq başla kim sevir ki?! Qarabağı
qoy dəlicəsinə Ali Baş Komandan, müdafiə naziri...
sevsin...
***
Bir
sözlə, Bakı Şampan Şərabları Zavodunun
direkorunun bu addımı dəstəyə layiqdir. Amma bir qüsuru
ilə.
Məlumdur
ki, Qarabağdan başqa Göyçə və Zəngəzur,
Basarkeçər... də indi xəyallarda yaşayır, heç
kim ayıq başla bu torpaqları düşünmür.
Elə isə, çox yaxşı olardı, həm də
"Za Qyoydja", "Za Zanqazur", "Za Basarkeçar"
və s. kimi araqlar da buraxılsın.
Təsəvvür
edin, bir milyondan çox qarabağlı və 300 mindən
çox Qərbi azərbaycanlı indi dədə-baba yurdunu
xəyallarında yaşadır, xatirələrində,
yuxusunda anır. Adam yarım litr araq vuranda heç bilirsiniz
necə xəyallanır, köhnə xatirələri necə
yada düşür?! Yəqin ki, bu hesabla, Bakı Şampan
Şərabları Zavodu hər gün 100 min butulka araq sata
bilər. Və belə getsə, yaxın bir-iki ilə bütün
ölkə araq vurub xəyallanıb, Qarabağı, Qərbi
Azərbaycanı xatırlayacaq. Hələ getdikcə ayağı
yer tutanı qaçıb tərk edilən Naxçıvanı,
insanların işsizlikdən bezib köçdükcə boşalan
ucqar dağ kəndlərimizi, Borçalı ellərini...
demirik.
Bir
sözlə, Vətəni ayıq başla və açıq
gözlə, anlaqlı vicdanla sevmək heç kimə xeyir
veməyib. Ona görə də, "Za Karabax"- irəli!
Yəni restoran və kafelərə doğru!!!
Asif
MƏRZİLİ
P.S.
Deyəsən, ölkədə Qarabağ problemi sarıdan ayılmaq
təhlükəsi çox ciddidir! Və QAT sədri Akif Nağıdan
bu məsələyə munasibət bildirməsini istəyirik.
"Za
Karabax" kimin "zakazıdır"?
Mayın
25-27-də Heydər Əliyev adına İdman və Konsert
Kompleksində İTE Group Plc. və İTECA Caspian ltd. şirkətinin
təşkilatğçılığı ilə 11-ci
Azərbaycan Beynəlxalq Qida Sənayesi sərgisi keçirildi
"Mənşəyi
məlum olmayan
bu
araqdansa, neçə illərdir tamarzı qaldığımız
İsa bulağının buz kimi suyundan bir ovuc içib, "Lənət
yezidə!"- deməyi gerçəkləşdirmək
üçün ayıq başla Qarabağın azadlığı
uğrunda gedəcək döyüşlərə hazır
olmaq daha məsləhətdir..."
Sərgidə
14 ölkədən 50 şirkət iştirak edirdi. Fransa, Türkiyə,
Ukrayna, Rusiya, Almaniya, Moldova, İtaliya, Avstriya, Qazaxıstan
və digər ölkələrin tanınmış şirkətləri
ilə yanaşı, sərgidə Azərbaycandan "Azərsun
holdinq", "Bakfem", "Kristal MMM", "Pepsi Baku",
"Bakı Şampan Şərabları" Səhmdar
Cəmiyyəti və sair şirkətlər də öz
məhsullarını nümayiş etdirirdilər. Azərbaycan
sahibkarları ilə müxtəlif ölkələrin şirkətləri
arasında əməkdaşlığın inkişafında
əhəmiyyətli rol oynayan bu sərgidə,
nədənsə, "Bakı Şampan Şərabları"
SC yalnız məhsullarından nümunələri
sərgiləməklə vəzifəsini bitmiş hesab edirdi.
Qeyd
edək ki, sözügedən şirkətin nümayiş
etdirdiyi məhsullar arasında son vaxtlar ictimaiyyət
tərəfindən birmənalı qarşılanmayan "Za
Karabax" arağı da yer almışdı.
Arağın
insan orqanizminə təsiri barədə dolaşan
ziddiyyətli fikirlərə aydınlaq gətirmək
məqsədilə şirkətin sərgidəki
səlahiyyətli təmsilçisinə müraciət
etmək qərarına gəldik. Lakin ilkin mənbənin,
yəni istehsalçının özünün dilindən
məsələyə münasibət eşitmək cəhdimiz
baş tumadı. Belə ki, şirkətin
texnoloqu Nadir İsmayılov faşizm üzərində
qələbənin 60 illiyi münasibətilə istehsal
etdikləri "Za Karabax" arağı ilə bağlı
heç bir açıqlama vermək səlahiyyətində
olmadığını bildirdi. Araqla bağlı mətbuatda
dərc olunan ziddiyyətli yazılara etirazını
bildirən N.İsmayılov bir mütəxəssis kimi
məhsulun keyfiyyətinin standartlara uyğun olduğunu vurğuladı.
O
ki qaldı arağın niyə məhz "Za Karabax" adlandırılmasına,
bu barədə açıqlama verməyəcəyində
israrlı olan N.İsmayılov şirkətin
rəhbərliyinə müraciət etməyimizi
məsləhət bildi.
İşlədiyi
şirkətin sirr hesab olunmayan adi telefon nömrəsini
belə deməyə cürəti çatmayan texnoloqun istehsal
etdikləri məhsulların keyfiyyəti barədə söylədiklərinin
həqiqət olduğuna necə inanasan?!
Odur
ki, mənşəyi məlum olmayan bu araqdansa, neçə
illərdir tamarzı qaldığımız İsa bulağının
buz kimi suyundan bir ovuc içib, "Lənət yezidə!"-
deməyi gerçəkləşdirmək üçün ayıq
başla Qarabağın azadlığı uğrunda
gedəcək döyüşlərə hazır olmaq daha
məsləhətdir.
Siz
necə fikirləşirsiniz?!
ELBAR
QAT
"DQR"a xəbərdarlıq etdi
Qarabağ
Azadlıq Təşkilatı (QAT) işğalçı
rejimin Dağlıq Qarabağda keçirməyə hazırlaşdığı
"parlament seçkiləri" ilə bağlı
bəyanat yayıb
QAT-ın
mətbuat xidmətindən APA-ya daxil olan bəyanatda bu aksiya
Ermənistanın beynəlxalq hüquqa qarşı nümayiş
etdirdiyi növbəti hörmətsizlik və qondarma "DQR"-in
təbliğatı kimi qiymətləndirilir. QAT Ermənistanın
təcavüzkar əməllərindən əl çəkməməsini
beynəlxalq təşkilatların qətiyyətsiz mövqeyi
ilə izah edir. Təşkilat Ermənistandan təcili olaraq işğal
etdiyi ərazilərdən çıxmağı tələb
edir və normal dövlət kimi qalmaq istəyirsə, bölgə
dövlətləri ilə normal əlaqə qurmasının
vacibliyini bir daha xatırladır: "Sonra gec olacaq.
Azərbaycan xalqı onsuz da torpaqlarını hərb yolla işğaldan
azad edəcək və düşmənləri
ərazisindən qovub çıxaracaq. Ondan sonra isə işğalçı,
terrorçu Ermənistana regionda yer olmayacaq".
QAT
belə hesab edir ki, Azərbaycan hakimiyyəti və
beynəlxalq təşkilatlar işğal olunmuş
ərazilərdə Ermənistanın "seçkilər"
keçirmək cəhdlərinin, növbəti erməni
təxribatının qarşısını almalıdır.
Əks halda, QAT hakimiyyət orqanları, beynəlxalq nümayəndəliklər
və səfirliklərin qarşısında etiraz aksiyalarına
başlayacaq.
