Milli Məclis
payız sessiyasına başladı
Prezident İlham Əliyev:
"Mənim prezident olduğum dövrdə
Dağlıq Qarabağ məsələsində heç bir
güzəştə gedilməyəcək"
Milli Məclis payız sessiyasına başladı. Azərbaycan prezidenti
İlham Əliyev sessiyanın açılış mərasimində
çıxış edərkən deyib: "Parlament
binasında aparılan təmir işlərinə baxanda
sevinirəm. Fikirləşirəm ki, kaş
mənim deputat olduğum dövrdə də bu cür
təmirli parlament binası olaydı".
Azərbaycan cəmiyyətində parlamentin
rolunun artdığını deyən dövlət başçısı
bildirib ki, parlament seçkiləri həmişə yeni
dövrün başlanğıcı olub. Azərbaycanın
gələn il üçün
dövlət büdcəsindən danışan prezident deyib
ki, dövlət qeyri-neft sektorunun inkişafına xüsusi
diqqət verir: "Bizi qınayırlar ki, Azərbaycanın
dövlət büdcəsi neftin hesabına
artırılır. Ancaq hökumət qeyri-neft
sektorunun inkişafı üçün irimiqyaslı
layihələr həyata keçirir. 2007-ci
ilin dövlət büdcəsi sosial
yönümlüdür".
Azərbaycan prezidenti ölkədəki infrastruktur
layihələrin 2007-2008-ci ilə qədər başa çatdırılacağını
vurğulayıb. 2008-ci ildən sonra Azərbaycanda
hüquqi dövlət quruculuğu dövrünün
başlanacağını deyən İ. Əliyev siyasi
islahatlarının aparıldığını da vurğulayıb.
Regionlarda görülən işlərdən danışan
dövlət başçısı 450 min yeni iş yerinin
açıldığını, son 2 ildə 600
məktəbin tikildiyini və ölkəyə böyük
valyuta axınının gəldiyini qeyd edib. Prezident deyib ki,
yaxın vaxtlarda Bakı-Tiflis-Axalkalaki-Qars dəmiryolu xətti
fəaliyyətə başlayacaq və bu, ölkədə
yeni situasiya yaradacaq: "Azərbaycan dövlətinin
qarşısında Dağlıq Qarabağdan başqa problemi
qalmayıb. Dağlıq Qarabağ probleminin
həlli təkcə Azərbaycanın mövqeyindən
asılı deyil. Bizim bu
məsələdə mövqeyimiz dəyişməz
qalır. Azərbaycanın ərazi
bütövlüyü təmin olunmalı, BMT-nin 4
qətnaməsi icra edilməlidir. Hesab
edirik ki, Azərbaycanın tərkibində Dağlıq
Qarabağa yüksək muxtariyyət verilməlidir. Problemin həlli üçün gözəl imkanlar
var. Biz bu məsələdə informasiya hücumuna
keçmişik. Bundan sonra da iqtisadi
hücuma keçməliyik. Gələn il
Azərbaycanın hərbi büdcəsi Ermənistanın
dövlət büdcəsinə çatdırılacaq. Azərbaycan ümumilikdə hücum siyasətini
yeritməlidir. Bəzi hallarda
opponentlərimiz bizi Dağlıq Qarabağ probleminin
həllini tapa bilməməkdə qınayırlar. Bu problem ona görə həll olunmur ki, Azərbaycan
hər hansı razılaşmaya getmir. Şəxsən
mənim prezidentlik dövrümdə hər hansı
güzəştə gedilməyəcək. Hələlik danışıqların ATƏT-in
Minsk Qrupu çərçivəsində
aparılmasının tərəfdarıyıq".
"ABŞ
yetkililəri diqqətli olsunlar"
Sadiq İsabəyli:
"Azərbaycan türkləri etnik azlıq deyil"
ABŞ Dövlət Departamenti İranda yaşayan və
milli hüquqlarını tələb etdiyi üçün
təzyiqlərlə üzləşən
azərbaycanlıların sıxışdırılmasına
münasibət bildirib.
Departament azərbaycanlıların təqib edildiyini
açıq şəkildə bildirib: "İnanırıq
ki, azərbaycanlıların İran rejimi tərəfindən
basqıya məruz qalması İranda etniklərə,
xüsusilə də, öz haqqlarını tələb
etmək əzmində olan xalqlara qarşı davam edən
təqiblərin bir hissəsidir. Azərbaycanlılar
2006-cı ilin mayında dinc nümayişlər zamanı
döyülüb, təzyiqlərə və
həbslərə məruz qalıb. İran
məktəblərində Azərbaycan dili qadağan
edilib". Dövlət Departamenti İran
hökumətini vətəndaşlarının
hüquqlarına hörmətlə yanaşmağa
səsləyib.
"Oyanış" Azərbaycan Strateji Araşdırma
Mərkəzinin eksperti, politoloq Sadiq İsabəyli
"OLAYLAR"a açıqlamasında bu
hesabatı müsbət dəyərləndirib: "Biz bu
sənədi müsbət qiymətləndiririk. Nəhayət, Milli Hərəkat dünyanın
diqqətini özünə çəkə bildi".
Bununla belə ekspert sənəddə sayı 35 milyona
çatan Azərbaycan türklərinin "etnik azlıq"
kimi göstərilməsi ilə razı deyil: "ABŞ
rəsmiləri həmişə
ölçülü-biçili danışırlar. İstərdik ki, bu məsələdə də
diqqətli olsunlar. Azərbaycan
türkləri etnik azlıq deyil, sadəcə,
hüquqlarını itirmiş etnik çoxluqdur, İran
əhalisinin yarıdan çoxunu təşkil edən bir
toplumdur".
QAT-dan həmsədrlərin
səfərinə etiraz
ATƏT-in Minsk Qrupu həmsədrlərinin
bölgəyə səfərini Qarabağ Azadlıq
Təşkilatı etirazla qarşılayıb. Təşkilatın
yaydığı bəyanatda bildirilir ki,
həmsədrlərin təklif etdikləri son variant birmənalı
şəkildə Ermənistanın maraqlarına uyğun
gəlir, bu variantın həyata keçirilməsi
Azərbaycan üçün Dağlıq Qarabağın
Laçınla birlikdə həmişəlik itirilməsi
deməkdir.
QAT bəyan edir ki, Azərbaycan
xalqının iradəsinə zidd olan hər hansı həll
variantının qarşısını alacaq,
işğalçı Ermənistanın iyrənc
niyyətlərinin həyata keçirilməsinə yol
verməyəcək, beynəlxalq təşkilatlar və
ayrı-ayrı dövlətlərin Azərbaycanın
maraqlarına, haqq işinə qarşı yönəlmiş
fəaliyyətinin qarşısının alınması
üçün bütün imkanlardan istifadə
edəcək: "Biz həmsədrlərin bölgəyə
səfərlərinin və ümumiyyətlə,
fəaliyyətlərinin dayandırılmasını
tələb edirik. Bakıda olduqları
müddətdə onların hərəkət,
görüş və müzakirə imkanlarını
məhdudlaşdırmaq üçün müxtəlif
vasitələrdən istifadə edəcəyik".