Milli
azlıqları niyə özümüzə düşmən
edirik?
Biz
bəzən türk olana da kürd deyib onu özünü kürd
kimi aparmağa məcbur
edirik...
Çoxdan
idi ki, bu mövzuda yazmaq istəyirdim. Lakin mövzu o
qədər həssas və incə mahiyyət daşıyırdı
ki, sadəcə, bu barədə hələki susmağa üstünlük
verməkdən də başqa yol görmürdüm... Amma
sonralar da görürdüm ki, susmaq məhz bu
məsələdə heç də qızıl deyil. Əksinə,
ağına-bozuna baxmadan ölkədəki milli azlıqlara
həqarətlə baxanların meydan suladıqlarını görməmək
mümkün deyildi.
Açığını
deyim ki, məni bu məqaləni yazmağa məhz "Azadlıq"
qəzetinin 17 yanvar 2006-cı il tarixli, 12-ci sayında dərc
olunan "Rövnəq Abdullayevin "karusel əməliyyatı",
"O, "Azneftyanacaq" zavodundakı əlaltılarını
ARDNŞ-ə gətirməklə Bəylər Əyyubovla
həyata keçirdiyi neft oğurluğunu gizli saxlamaq
istəyir"- başlıqlı məqalə məcbur etdi.
Təbii ki, söhbət nə Rövnəq Abdullayevin, nə
Bəylər Əyyubovun, nə də məqalədə adı
çəkilən digərlərinin vəzifəsindən,
yaxud qəzetin yazdığı kimi, hansısa mafioz qrupla
mənsubluğundan və s. getmir. Söhbət
məqalədəki kürd- milli mənsubiyyət faktorunun
önə çəkilib xüsusilə vurğulanmasından
gedir...
Biz
kimik?
Çox
təəssüf ki, ölkənin aparıcı
qəzetlərindən birində belə bir naşı, dövlətçiliklə
dövlət başçısını qarışıq
və dəyişik salan yazı dərc edilib. Bəli, "Azadlıq"
müxalifət qəzetidir və müxalifətə rəqib
olan prezidenti, hakimiyyəti, hakimiyyətin siyasətini, bu
siyasəti həyata keçirən məmurları tənqid
etməlidir və s. Amma bu nə dərəcədə doğrudur
ki, hansısa məmuru tənqid edəndə onun
əməlindən daha çox milli mənsubiyyətini önə
çəkəsən?!
***
Konkret
halda, qeyd edilən məqalədə ARDNŞ-ə
rəhbər təyin edilmiş Rövnəq Abdullayevin
prezidentin şəxsi mühafizə xidmətinin rəisi
Bəylər Əyyubovla xala oğlu olduğu qeyd
edilməklə, yenə də onların kürd olduğunu
önə çəkir, xüsusi canfəşanlıqla
hallandırırlar. Məqalədən bəzi sitatları ardıcıllıqla
təqdim edir və təhlil etməyi elə həm də
məqalə müəllifinin öhdəsinə buraxıram.
Lakin həm də indidən sual edirəm: cənablar, bəs
biz kimik, hansı millətin nümayəndəsiyik? Görəsən,
dünyada elə bir laboratoriya varmı ki, kimin hansı
millətə mənsub olduğunu müəyyən edə
bilsin? Bilmirəm, bəlkə "Azadlıq"
qəzetində (həmçinin bəzi qəzetlərdə)
belə bir laboratoriya və ya xüsusi aparat var, ya yox, amma onu
bilirəm ki, bu məqaləni oxuyanda yanımda əyləşmiş,
olduqca qeyrətli və namuslu, Qarabağ döyüşlərində
atası və qardaşı şəhid olmuş bir kürd
dostumdan üzr istəməli oldum...
Biz
erməni "dəyirmanına" niyə su tökürük
axı?
Qəzetdən
sitatlar: "...Neft sektoruna bütünlüklə
nəzarət edən quruma R.Abdullayevin rəhbər təyin
olunması diqqət çəkməliydi. Ən azı müəyyən
dairələr ölkənin ən strateji sərvəti olan
neft sənayesinin hansı qrupun nəzarətinə verildiyini
araşdırmalı idilər. Lakin bu baş vermədi və
nəticə olaraq Azərbaycanın dövlət büdcəsinin
60 faizdən çoxunu təşkil edən neft
gəlirləri hakimiyyətdəki etnik mafioz qrupların tam
nəzarətinə keçdi"; "...Rövnəq
Abdullayevin təyinatı isə sırf hakimiyyətdəki
etnik azlığın maraqları çərçivəsində
həyata keçirilən bir addımdır"; "Maraqlıdır
ki, internet saytı yaradaraq şəcərəsinin təmiz türk
olduğunu təqdim edən Abdullayevin etnik azlığın nümayəndəsi
olduğu artıq təsdiqlənir... Məlumatlarda qeyd olunur ki,
R.Abdullayev Bəylər Əyyubovun xalası oğludur. Yəni
tərtəmiz kürddür"; "...Təsadüfi deyil ki,
Abdullayevin vaxtilə rəhbərlik etdiyi zavodda 400 nəfər
kürdün çalışdığı vurğulanırdı...
İndi həmin kadrlar ARDNŞ-də yerləşdirilir...
Belə ki, Abdullayev vaxtilə rəhbərlik etdiyi "Azneftyanacaq"
zavodunda onun məxfi tapşırıqlarını həyata keçirmiş
müavini Mikayıl İsmayılovu ARDNŞ-də ümumi, müəssisənin
baş mühəndisi Davud Məmmədovu zavoda direktor, Elşad
Nəsirovu xarici iqtisadi əlaqələr, Şahin Mustafayevi
iqtisadiyyat məsələləri üzrə vitse-prezident
təyin edib. Zavodda kadrlar üzrə müavin işləyən
Xalid Məmmədova isə daha mühüm bir post, İşlər
İdarəsinin rəisi vəzifəsi həvalə olunub".
***
Göründüyü
kimi, bütün məqamlarda kürd faktoru önə çəkilərək,
bu gün Azərbaycanın dövlətçiliyi
üçün vacib bir problemə naşı münasibət
ortaya qoyulur. Niyə? Halbuki M.İsmayılov Ağsudandır,
D.Məmmədov Kürdəmirdən, E.Nəcəfov
əslən Dağıstandandır, Bakıda doğulub, general
Nəsirovun oğludur. Ş.Mustafayev Qazaxdan, X.Məmmədov
isə Astaradandır. Mən onları çox yaxşı tanıyıram.
Rövnəq Abdullayev isə Naxçıvandandır, atası
və anası (rəhmətə gedib) müəllimdirlər...
Milli
mənsubiyyət problemi kimə lazımdır?
Azərbaycanda
uzun illərdir ki, kürdlər, gürcülər, ruslar,
ləzgilər, talışlar, ermənilər, tatlar, türklər,
yəhudilər... birgə yaşayıblar. Ta 1987-ci
ilədək. O vaxt erməni akademiki Aqambekyan Fransada nəşr
olunan elmi jurnalların birində Qarabağda yaşayan
ermənilərin muxtariyyəti məsələsinə
toxunmaqla, əslində onların Azərbaycandan kənarda, müstəqil
yaşamaq problemini ortaya qoydu... Sonralar nə baş verdyini hamımız
bilirik. Fransada çıxan bir jurnal məqaləsi ilə 18
ildir ki, Azərbaycan dövlətçiliyinə ağır
zərbə vurulub və hələ də kələfin ucunu,
problemin ağırlıq mərkəzini tapa bilmirik. Halbuki uzun
illər boyudur ki, ruslar, gürcülər və
ermənilərdən başqa, yerdə qalan milli azlıqların
nümayəndələri heç vaxt nə özlərini
milli azlıq kimi hiss ediblər, nə də özlərinə
kürd, ləzgi, yaxud talış deyiblər. Bu söhbət-
problem yalnız o vaxt ortaya çıxıb ki, biz
məsələn, Lənkərandan olan bacı və qardaşlarımıza
talış, Qubadlı və Laçından olana kürd,
Qusardan olanlara ləzgi demişik. Bir sözlə, biz, guya özümüzü
dövlətçilik fədailəri hesab edərək,
lənkəranlının özünə talış kimi, laçınlının
özünə kürd və qusarlının özünü
ləzgi kimi və s. aparmasına süni surətdə
məcbur etmişik. Halbuki bu sözü deyənlər özləri
də ola bilsin kürd, ləzgi və ya talış olublar.
***
Bəs
bu gün mətbutda kürd, ləzgi, talış və s. söhbətini
ortaya atmaq sizcə, Azərbaycan dövlətçiliyinə
xidmətdirmi? Yuxarıda qeyd etdim, biz hələ erməni
problemini çözüb qurtara bilmirik, bəs elə isə
bu dövlətə və Azərbaycana durduğu yerdə talış,
kürd və s. problemləri sırımaq, özü də
zor gücünə sırımaq kimə və nəyə lazımdır?
Milli
mənsubiyyət və vəzifə
Əgər
kiminsə, məsələn, Bəylər Əyyubovla şəxsi
problemi, Rövnəq Abdullayevlə düşmənçiliyi
varsa, bunu niyə dövlətçilik müstəvisinə
çıxarır? Sözün əsl mənasında mazut iyi
verən belə yazı-pozular dövlətçiliyimizə
vurulan zərbədir. Özü də elə bir zərbə
ki, onu heç nə ilə müqayisə etmək mümkün
deyil.
***
Bəli,
Azərbaycanda çoxsaylı millətlərin nümayəndələri
yaşayıb, yaşayır və yəqin ki, yaşayacaqlar.
Deməli, o cümlədən "Azadlıq"
qəzetində kimisə ciddi narahat edən kürdlərin
də idarəetmədə, iqtisadi sahədə,
səhiyyədə, təhsildə fəaliyyəti olmalıdır.
Çünki onlar kürd, talış, ləzgi və ya
yəhudi olmaqdan əvvəl bu ölkənin vətəndaşlarıdırlar.
Konstitusiyamızda isə onların hüquqları milli
mənsubiyyətlərinə görə göstərilmir.
Bu
hüquqlar onların Azərbaycan vətəndaşlığından
irəli gəlir.
Sual
edirəm: necə ola bilər ki, məsələn, kürdlərin
torpaqlarımız uğrunda şəhid getməsindən
fəxr duyuruq, amma onların bir nümayəndəsi hansısa
vəzifəyə irəli çəkilirsə, bu, mafioz qruplaşma
mənasını daşıyır?!
Heç
uzağa getməyək: Moskvada hər il milli azlıqlara, xüsusən
də qafqazlılara, daha çox da çeçenlərə
və azərbaycanlılara qarşı repressiyalar olur.
Biz,
o cümlədən "Azadlıq" qəzeti redaksiyası
da, bunu çox pis qarşılayırıq. Tələb
də edirik ki, niyə milli azlıqlara qarşı belə münasibət
var?
Bunu
deyə-deyə, özümüz burda- Azərbaycanda "qaşınmayan
yerdən qan çıxardır", milli azlıqlara çəpəki
baxmağa cəhd edirik.
***
Başqa
bir misal: Rusiyada yüksək vəzifə tutan azərbaycanlılar
var - Vahid Ələkbərov, Gülağa Qənbərov, Araz
Ağalarov və digərləri. Kimsə Rusiya mətbuatında
belə bir yazıya rast gəlibmi ki, məsələn, Vahid
Ələkbərov, yaxud Araz Ağalarov niyə milli azlığın
nümayəndəsi- azərbaycanlı kimi neft sektoruna, yaxud
iqtisadi sahəyə yaxın buraxılır?.. Varmı belə
bir naşı, çiy yazı? Yəqin ki, yoxdur və ola da
bilməz! Çünki onlar Rusiya iqtisadiyyatında
azərbaycanlı olduğuna görə deyil, Rusiya
vətəndaşı olduqlarına görə yuxarı
çəkiliblər...
Milli
azlıqlarda mütəşəkilliyi yaradan başlıca
səbəb nədir?
Yəqin
ki, hər birimiz yaşadığımız ərazidə kürdlərlə,
ləzgilərlə, talışlarla... əhatəliyik. Amma
hamımız Azərbaycan dilində danışdığımız
üçün (Rusiyada da hamı rus dilində danışdığı
kimi) kimin türk, kimin talış və ya kürd olduğunu
heç kim nə hiss edir, nə də fərqinə varır.
Belə mehriban və səmimi qonşuluqda kim deyə bilər
ki, kim kürddür, kim türk və ya talış?
Bəlkə mən kürdəm? Bəlkə sən talışsan?
Bəlkə o türkdür? Axı milli mənsubiyyət kimin
hansı bölgədə yaşamasına, ləhcəsinə
görə deyil. Xüsusən də türklər, kürdlər,
talışlar və ləzgilər arasında. Hamının
rəngi, sifət quruluşu, gözünün rəngi
demək olar eynidir. Təcrübə sübut edir ki,
məsələn, hətta rus uşağı azərbaycanlı
ailəsində doğulub-tərbiyə alırsa, o, böyüyəndə
90-95 faiz azərbaycanlı kimi olur. Məsələn, bu gün
özünü türk adlandıran kimsə necə və
nə ilə sübut edə bilər ki, o, həqiqətən
də talış, yaxud kürd deyil? Mən özüm Ağdamda
doğulmuşam. Bəlkə həqiqətən də
mənim babamın babası, məsələn, kürd olub
və sadəcə, mənim atam məni Ağdamda əkib, anam
Ağdamda doğduğuna görə türkəm!.. Əgər
atam məni məsələn, Laçında dünyaya
gətirmiş olsaydı- kürd, Lənkəranda dünyaya
gətirsəydi- olacaqdım talış? Yaxud yaxın dostum
və qələmdaşım Qənimət Zahid necə sübut
edə bilər ki, o, Şamaxıda doğulub və tat, yaxud
talış deyil, türkdür?..
***
Bunları
deməkdə məqsədim odur ki, dünyanın bir heç
bir yerində milli mənsubiyyəti müəyyən edən
laboratoriya yoxdur. Etnik münaqişəyə (ermənilərlə-
red.) cəlb olunmuş Azərbaycan üçün isə
belə bir sortlaşdırmaya qətiyyən ehtiyac yoxdur. Bu gün
kim təminat verə bilər ki, onun oğlu bir ləzgi və
ya kürd, talış qızına aşiq olmayacaq və
əksinə!!!
Elə
isə süni kürd, ləzgi və ya talış
məsələsini qabartmaq, heç kürd olmayanı da
özünü kürd kimi aparmağa məcbur etmək
nəyə və kimə lazımdır? Bəlkə bu,
Azərbyacanı parçalamaq üçün yeni bir "silah"
növüdür və hansısa dövlət bundan
istifadə edir?..
***
Son
olaraq, bu gün Azərbaycan mətbuatında, xüsusən
də kürd məsələsini gözə soxmağa çalışanlara
məsləhət görərdik ki, onlar əvvəlcə
özlərinin türk olduqlarını sübut etsinlər.
Özü də sözün bütün mənalarında.
Çünki əsl türk olan, dövlətini və dövlətçiliyini
sevən şəxs belə siyasətsizliyə könül
verməz...
Asif
MƏRZİLİ
Nazir
yazır...
Məktəb
direktoru pozur
Nazirliyin
nümayəndəsi isə yozur
Nazir
Polad Bülbüloğlunun mədəniyyətimizin inkişafı
istiqamətində imzaladığı əmr və
sərəncamlara təəssüf ki, bəzi
mədəniyyət müəssisələrinin, musiqi
məktəblərinin rəhbərləri sayğısızlıq
göstərirlər. Vəzifələrini
bilərəkdən yerinə yetirməyən belə
rəhbər şəxslərin müəssisələrində
neqativ hallar baş alıb gedir. Bunu görənlər isə
öz maddi maraqları üçün çatışmazlıqları
ört-basdır edirlər. Hətta nazirə yalnış
məlumatlar verirlər.
Şübhəsiz
ki, hər bir musiqi məktəbindəki neqativ hallardan, ola
bilsin, nazirin xəbəri olmasın. Bəs həmin
sahəyə məsul olanlar nə iş görürlər? Doğru
deyiblər, oğruluğun, əyriliyin müddəti qırx gün
çəkir...
Bu
məsələnin Ağstafa rayon H.Arif adına 7 illik musiqi
məktəbinin direktoru Arif Əliyevə nə qədər
aidiyyəti var, bunu bir azdan biləcəksiniz...
Vaxt
var idi ki, bu musiqi məktəbi respublikada şöhrət tapmışdı.
Məktəbin sabiq direktoru dünyasını dəyişəndə
çoxları təəssüfləndi.
Arif
Əliyev xalq cəbhəsi hakimiyyətinə asanlıqla "xod"
tapa bilmişdi. Onu musiqi məktəbinə direktor təyin
ediblər. A.Əliyev ilk gündən ixtisaslı müəllimlərə
qənim kəsilir. Ondan bunun səbəbini soruşanlara deyib
ki, "ağıllı rəhbər gələcəkdə
yerinə göz dikə biləcək kadrı
zərərsizləşdirməlidir". Əhsən A.Əliyevin
"uzaqgörənliyinə". Odur ki, 30 il
məktəbdə işləyən Türkan Quliyeva gözüm
çıxdıya salınır. Türkan müəllimə
bu haqsızlığa dözməyib öz ərizəsi
ilə işdən çıxır.
Direktor
A.Əliyev qalan müəllimlərə xəbərdarlıq
edir ki, "mənimlə hesablaşmasanız, sizi də Türkanın
taleyi gözləyir!" Günlərin birində 1987-ci
ildən məktəbdə müəllimə Nərminə
Xəlilova direktora cavab qaytarır. Deyir ki, "ay direktor,
bəsdir bizə əzab verdiyin". Elə həmin gündən
A.Əliyev Nərminə xanımın adını "qara
dəftərinə" yazır.
Bir
gün Nərminə müəllimə dərsə
gələndə görür ki, "zəif" şagirdi
İsgəndərova Fərqanə yuxarı sinifə keçirilib.
N.Xəlilova direktora bildirir ki, həmin şagird yuxarı
sinfə layiq deyil, "3"-ü zorla alır, bu, əlaçı
şagirdlərdə ruh düşgünlüyü yaradır.
Direktor
təkidlə bildirir ki, "mənə ağıl öyrətmə,
mən nə desəm qanundur".
Odur
ki, N.Xəlilova direktorun əməlləri barədə
Mədəniyyət Nəzirliyinə şikayət yazır.
Elə o gündən də Nərminə müəllimənin
"qara günləri" başlayır.
Xəbər
çatır ki, mədəniyyət nazirliyindən Səid Hacıyev
adlı şəxs şikayəti araşdırmaq
üçün məktəbə gəlir. Eyni zamanda bir
xəbər də yayılır ki, nazirliyin nümayəndəsi
direktor A.Əliyevlə artıq "məsələni həll
ediblər", yəni "sövdələşmə baş
tutub". S.Hacıyev nazirliyə çatar-çatmaz hay-həşir
salır ki, "Arif Əliyev kristal oğlandır, nazirimiz
Polad Bülbüloğluna həmişə sitayiş (!) edir.
Ərizəçi çox şeyi yalan yazıb".
Nə
isə... S.Hacıyev yalanın əlindən tutub yeridir.
***
İndi
ərizədə yazılanlardan qısa xülasə:
"...Musiqi
məktəbində qeyri-ixtisas sahiblərinin diplomlarına
nəzər yetirin. İxtisaslı müəllimlər sıxışdırılır.
Arif Əliyevin bacısı İradə 7 illik musiqi
məktəbinin qarmon sinfini bitirib, ancaq musiqi ədəbiyyatından
dərs deyir. Mənim ərizəmdən sonra direktor düzəlişlər
edib. Müəllimlərə əvəzçilik yazılır,
pullar isə direktora çatır. Uzun illərdir
məktəbdə təmir işləri aparılmır. Ona görə
də təmirə ayrılan pullar A.Əliyevin cibinə girir.
Ezamiyyət vərəqlərini araşdırmağa ehtiyac
var. Ezamiyyət vərəqəsinə baxıb sorğu edin görək
müəllim və şagirdlər həmin şəhəri
tanıyırlarmı?"
Yaxşı,
nazirliyin nümayəndəsi Səid Hacıyev şikayətdə
göstərilən faktları niyə səthi araşdırıb?.
Bəs bilmirmi ki, nə vaxtsa nazir hər şeydən
xəbərdar ola bilər?! Görünür, rayon prokurorluğunun
müdaxiləsi lazım gələcək.
Özbaşınalığın
böyüklüyünə baxın ki, Arif Əliyev arxasına
güvənərək Nərminə Xəlilovanı işdən
azad edir. N.Xəlilova direktorun və nazirliyin nümayəndəsi
Səid Hacıyevin əməllərindən və işdən
çıxarılması barədə yenidən nazirliyə
məktub göndərir. A.Əliyev bunu nəzərə almadan
gülünc bir əmr yazır və müəllimənin
əmək kitabçasını korlayır.
Əmrdə
yazılır: "Respublikanın rəhbər orqanlarına
sistematik olaraq böhtan xarakterli ərizə və şikayət
verdiyinə, işindəki ciddi nöqsanlara, pedaqoji
fəaliyyəti ilə bir araya sığmayan
hərəkətlərə yol verdiyinə, habelə kollektiv
və şagirdlər arasında özünü tam nüfuzdan
saldığına, rəhbərlik tərəfindən verilmiş
göstərişlərdən nəticə çıxarmadığına
görə vəzifəsindən azad edilsin (əmr ¹69,
24.10.2005.)".
Halbuki
on müəllimin tərtib etdiyi aktda göstərilib ki,
Nərminə Xəlilovanın kollektiv və şagird
kontingenti arasında böyük nüfuzu olub. O, həmişə
haqqın tərəfində dayanıb.
A.Əliyevin
əmrinə və kollektivin tərtib etdiyi akta nəzər
salanda belə düşünmək olar ki, direktor tabe olduğu
nazirliyə "meydan oxuyur".
Bu
oxumağın səsi isə inanırıq ki,
Mədəniyyət Nazirliyində tezliklə eşidiləcək...
(Davamı
var)
A.HƏQİQƏT