Qaxda
kök atmış bəla
Korrupsiyanın
rayondakı dayaqlarını laxlatmaq üçün mübarizəyə
İcra Hakimiyyətindən başlamaq gərəkdir
"Korrupsiyaya
qarşı mübarizə haqqında" Qanunun qüvvəyə
minməsindən 1 il on ay ötür. Ancaq aradan bu qədər
vaxt ötməsinə baxmayaraq, bu ümumbəşəri
bəla nəinki ölkəmizdən, heç Qax rayonundan da
ötüb keçməyib. Çünki bünövrəsi
sovet dövründən qoyulmuş bu sosial-iqtisadi bəla son
10-12 il ərzində özünün daha da möhkəmlənməsi
ilə daha da nəzərə çarpıb. Onunla mübarizə
aparmalılar isə korrupsiyanın dayaqlarının möhkəmlənməsinə
bais olublar. Bəs qəbul olunmuş qanun? Bəs tətbiq
edilməli olan Dövlət Proqramı? Bunları kim icra
etməlidir?
"İcraçılar
özləri korrupsiyanın səbəbkarlarıdır"
"Azərbaycan
Korrupsiyaya qarşı" Müstəqil Araşdırma
Qrupunun rəhbəri xanım Mirvari Qəhrəmanlının
təbirincə desəm, bütün hallarda korrupsiyaya qarşı
mübarizə aparmalılar özləri bu çirkin işin
arxasında dururlar və ona görə də ölkəmizdə
korrupsiyaya qarşı mübarizə yox
dərəcəsindədir.
***
Prezident
İlham Əliyevin son günlər atdığı addımı,
daha doğrusu, uzun illərdir adı korrupsiyada hallanan
səhiyyə naziri Əli İnsanovun, iqtisadi inkişaf naziri
Fərhad Əliyevin, "Azərkimya" DŞ-nin prezidenti
Fikrət Sadıqovun, Prezident Aparatının İşlər
İdarəsinin rəisi Akif Muradverdiyevin, Səhiyyə
Nazirliyinin məsul işçilərinin işdən çıxarılması
və bəzilərinin həbsi təqdirəlayiqdir. Lakin
çox təəssüf ki, bu adamlar rəsmi
səviyyələrdə siyasi qurbanlar kimi təqdim olundu...
Bəli,
balıq başdan iylənər. Ən yuxarı eşalonda
əyləşənlərin əməllərini görəndə,
rayonlarda baş verənlərə "şükür"
etməyə bilmirsən. Amma...
***
..."Korrupsiyaya
qarşı mübarizə haqqında" Qanunun tətbiqi
ilə bağlı Qaxda monitorinq keçirərkən,
qəribə mənzərənin şahidi oldum. Burada
korrupsiyaya qarşı mübariz olmalılar nəinki özləri
korrupsiyanın yaradıcılarıdır, onlar həm də
əvvəl qeyd etdiyim kimi, hələ də sovet psixologiyasının
daşıyıcılarıdırlar.
Qax
rayon İcra hakimiyyəti sovet hakimiyyətinə tabedir?
Bu
suala dəqiq cavab tapmaq üçün Qax rayon ziyalıları,
sadə adamlarla söhbətimizdən
bəhrələnməyə çalışdıq. Məlum
oldu ki, sovet hakimiyyəti bu rayonda hələ də mövcuddur.
Rayon sakini, təqaüddə olan H.Ağayevi elə RİH
binasının yanında söhbətə tutduq. Soruşduq:
-
Ağsaqqal, bu nəyin binasıdır?
-
Rayon partiya komitəsinin.
-
Başa düşmədik, məgər buranın adı
dəyişməyib?
Ağsaqqal
gülümsəyir:
-
Ad dəyişəndə məzmun dəyişmir? Əvvəlcə
işin məzmunu, fəaliyyəti dəyişsin, sonra adı.
Mən sovet hakimiyyətinin bərk gedən dövrünü
də görmüşəm, son 10-15 ili də. Bəli, ölkəmiz
müstəqildir. Qaxda da müstəqillikdir, amma RİH müstəqil
deyil. Keçmişin, yəni sovet hakimiyyətinin idarəçilik
psixologiyası ilə yaşayan məmurlar həmin idarəçiliyin
əsiridirlər. Ona görə də mən Qax RİH-ə
həmişə rayon partiya komitəsi deyirəm.
-
Rayonda korrupsiyaya qarşı mübarizəni görürsünüzmü?
Ağsaqqal
bu dəfə hazırcavablığından qalmır:
-
Gözüm zəif görür, yəqin ona görə də
görə bilmirəm...
***
Bəli,
Qaxda korrupsiyanı görməkdənsə, hiss etmək lazım
olduğunu dərk etməli məmurlar, deyəsən, yoxdur.
Olsaydı, yəqin ki, ağsaqqalın aforizmini də eşitməzdik.
***
Rayonda
rast gəldiyimiz insanların hansı birindən soruşduqsa,
sualımızı sualla qarşılayırdılar: "Nə
korrupsiya?"
Hətta
rayonun Kolxoz bazarında toyuq-cücə satan bir qadından soruşduq:
-
Xala, Qaxda korrupsiya ilə mübarizə barədə nə
deyə bilərsən?
-
Xala qurban, rayonda ziyanvericilərə qarşı heç bir mübarizə
yoxdur. Yazın, qoy prezident də bilsin!...
***
Qaxda,
deyəsən, korrupsionerləri "ziyanvericilər"- adlandırırlar.
Bu, nədirsə, təzə, özü də olduqca orijinal
addır.
"Qaxda
korrupsiyaya qarşı mübarizəyə icra
hakimiyyətindən başlamaq lazımdır!"
Bu
sözləri isə rayon ziyalılarından Seyran Rüstəmov
dedi. Söhbətimizdən məlum oldu ki, rayonun icra başçısı
Abbas Göyüşovu görüb dərdini deyənlər
yox dərəcəsindədir. Çünki bu dərdə
çarə tapılmırsa, onu deməyin nə mənası?!
Həmsöhbətimiz
deyir:
-
Qax turizmin inkişafı üçün ən əlverişli
bölgələrdəndir. Düzdür, təbiətin
səfalı yerlərini zəbt edib istirahət güşələri
yaradanlar da var. Amma bu, dövlət səviyyəsində
edilməlidir ki, turistələrin əylənməsi və
istirahəti üçün lazımi şərait yaradılsın.
Bu, Qax rayonunda minlərlə yeni iş yerləri demək olardı,
dövlət büdcəsi də qazanardı, sahibkarlar, iş
adamları da, üstəlik, turizm il boyu mövcud olardı. O
ki qaldı korrupsiya ilə mübarizəyə, Qaxda bunun şahidi
olmaq üçün icra başçısı Prezidentin
İcra Aparatının rəhbəri Ramiz Mehdiyevə tabe
olmamalıdır. Ölkədə bütün korrupsiya
məsələləri Ramiz Mehdiyevlə
əlaqələndirilir, amma R.Mehdiyev Korrupsiya ilə Mübarizə
Dövlət Komissiyasına rəhbər qoyulub.
-
Sizin özünüzdən nə vaxtsa rüşvət alıblarmı?
-
Xeyr.
-
Nə yaxşı!
-
Çünki mən rüşvət vermirəm.
-
Versəniz alarlarmı?
-
Göydə qaparlar... Görürsən ki, rayonda hansısa dövlət
məmuruna işi düşənlər olur, bir yerdə
həmin idarəyə gedirik və bu iş pulsuz-parasız
həllini tapır.
-
Bəs, ümumiyyətlə, Qaxda korrupsiyaya qarşı mübarizə
barədə nəsə deyə bilərsinizmi?
-
Görüb-eşitmədiyim və hiss etmədiyim şey
barədə nə deyim ki? Alırlar da, verirlər də. Rayon
İcra Hakimiyyətində hamının başı millət
vəkilliyinə namizəd Azər Kərimlinin təbliğatına
qarışıb, MSK isə buna görə cəzalandırıb.
Mən vaxtilə rayon icra başçısının müavini
işləmişəm. Bələdiyyə seçkilərindən
sonra bu vəzifədən çıxdım. Qaxda rüşvət
adi hal alıb. Adını belə qoyurlar: "Halallıq ver!"
-
Bəs hansısa vəzifəyə qoyularkən kimdənsə
pul alındığını eşidib-bilmirsiniz?
-
Təzə icra başçısı Abbas Göyüşov
gələndən sonra söhbət var ki, o müavin təyin
etmək üçün birindən 4 min, digərindən
isə 5 min dollar alıb. 4 min dollar verən iqtisadi
məsələlərə baxandır. O isə maşın
yuyanlara şərt qoyub ki, ayda 50 min manat mənə
verəcəksən. Hətta bəzən pulu özü gedib yığır
ki, birdən "ara adamı" 70 min alıb ona 50 min
verər. Vergi işçiləri də bunu bilirlər, amma
bilmirəm onlar bunu sizə deyərlərmi? İcra başçısının
müavini yeri 2 il boş qaldı. Mən bələdiyyə
sədrinin müavini işləyərkən icra başçısına
dedim ki, Qaxda bu qədər ziyalı potensialı var, o post
niyə boş qalıb? Özü də humanitar sahələr
üzrə. Sonradan məlum oldu ki, həmin yerə pul verən
yoxdur.
-
Niyə?
-
Çünki həmin sahə elədir ki, sonradan onu "çıxarmaq"
olmur.
-
İcra başçısı nə qədər istəyirmiş
ki?
-
5 min dollar!
"Qaxın
icra başçısı işdə yoxdur, müavini zibil daşıtdırır!"
Rayonda
korrupsiyaya qarşı mübarizə barədə bəzi
suallara cavab almaq üçün RİH başçısı
Abbas Göyüşovla görüşmək cəhdimiz baş
tutmadı. Çünki məqsədimizi polisə dedik. O,
yuxarı qalxıb-düşəndən sonra isə icra başçısı
"yoxa çıxdı". Sonra RİH başçısının
müavinlərindən hər hansı biri ilə danışmaq
istədik. Məlum oldu ki, RİH başçısının
müavini Tahir İsmayılov "ərazidə zibil yığdırır".
Digər müavin Ziyafət Xasıyeva ilə görüşməli
olduq.
***
Ziyafət
Xasıyeva ilə söhbət edirik. Məlum olur ki, o, rayonda
yaradılmış korrupsiya ilə mübarizə komissiyasının
üzvüdür:
-
Ziyafət xanım, Dövlət Proqramında yerli icra orqanlarının
Dövlət Komissiyasına 6 ayda bir dəfə hesabat
verməsi göstərilir. Mümkünsə, həmin hesabatın
surətini verəsiniz.
...Ziyafət
xanım bu sözləri eşidəndə bərk dilxor oldu.
Çünki söhbətimizin əvvəlində Prezident
Aparatına bu il 2 dəfə hesabat verdiklərini demişdi.
Belə çıxırdı ki, 2-ci hesabat vaxtından 3 ay
əvvəl göndərilib. Ona görə də cavab gözlədik.
Xeyli fikirləşdi, sonra dedi:
-
Bilirsiniz, bu, problem deyil. Amma gərək bir saat sonra
gələsiniz.
-
Oldu!- deyib getdik və düz saat yarım sonra yenidən
gəldik. Ziyafət xanım bizi görəndə lap dilxor oldu
və qaşqabağını salladı:
-
Vəziyyət yaman pisdir.
-
Niyə?
-
Kompüterdə işləyən qızın uşağı
ağır xəstədir, mümkünsə, günortadan
sonra gəlin.
-
Biz Bakıya qayıtmalıyıq. Tez olmazmı?
Ziyafət
xanım "qayıtmalıyıq" sözünü eşidəndə,
deyəsən, sevindi:
-
Yox, ancaq axşamüstü ola bilər.
-
Biz qaranlıqda necə yola çıxaq?
-
Vallah, heç nə deyə bilmərəm.
***
Xeyli
götür-qoy edib, Ziyafət xanımın sevincinin uzun sürməsinə
mane oldum:
-
Oldu, Ziyafət xanım!
-
Çox sağ olun, yaxşı yol! Yolda duman olur, ehtiyatlı
olun!..
-
Yox, biz getmirik, qalası olduq. Axşamüstü gəlib arayışı
götürərik.
***
Ziyafət
Xasıyeva xeyli fikirləşdi və deyəsən,
təzə bir ideya tapdı:
-
Bayaq yadımdan çıxmışdı, sizin ezamiyyə
vərəqəniz varmı?
-
Ziyafət xanım, sovet hökumətindən qalma ideyaları
atın getsin. Həmin qayda o vaxt jurnalistlərin sərbəst
gəzib fakt toplamağına məhdudiyyət qoyurdu. Ona görə
də indi yeni qayda-qanunda bu tələb yoxdur.
Məsələn, indi Andreas Qross Bakıya gəlib-gedir, ondan
ezamiyyə vərəqi tələb edir, yaxud möhür-ştamp
vururlar ki, geri qayıdanda harasa təqdim etsin? Əgər biz mühüm
dövlət tədbiri ilə əlaqədar rayona ezam
edilsəydik, bu başqa məsələ. Biz sizdən
məlumat istəyirik...
***
Ziyafət
xanım bütün bəhanələrdən sonra razılaşdı
ki, bir saata özü zəng edib tələb edilən arayışın
surətini bizə verəcək. Amma...
Bir
saat sonra zəng etdik, məlum oldu ki, Ziyafət xanım "əhatə
dairəsi xaricindədir!"
***
Rayon
prokurorluğuna və polis şöbəsinə də baş
çəkdik. Bu rəsmi dövlət idarələrində
isə belə bir oxşar cavab eşitdik: "Prokuror
yerində yoxdur", "Rəis ərazidədir".
Görəsən,
yerində olmayanlarla ərazidə olanlar prezidentin
sərəncamının icrası üçün nə
etməli olduqlarını müəyyənləşdirirlərmi?
***
Qaxda
gördüklərimizdən təəccüblənmədik.
Çünki Bakıdan Qaxa gedənədək yol boyu "Azpetrol"un
yanacaqdoldurma məntəqələrindən benzin alarkən
də korrupsiyanın şahidi olduq: ya çek vermək
istəmirdilər, ya da çekdə benzinin miqdarını göstərmirdilər.
Və Bakıya qayıdandan neçə gün sonra "Azpetrol"
rəhbəri R.Əliyevin korrupsiya üstündə həbsini
eşidəndə də təəccüblənmədim.
Çünki...
A.MƏMMƏDLİ,
Bakı-Qax-Bakı
P.S.
Yazı Korrupsiyaya Qarşı Mübarizə üzrə Dövlət
Proqramının monitorinqinə dair layihə çərçivəsində
hazırlanıb.
Cəlilabadda
dərəbəylikdir
Qəzet
çapa gedən anda redaksiyamıza Cəlilabad rayon
sakinlərindən iki məktub daxil oldu. Məktublarla tanış
olandan sonra haqqı tapdalanmış insanların harayını
ünvanlarına çatdırmağı özümüzün
peşə borcumuz bildik. Məktublara heç bir şərh
vermədən olduğu kimi dərc edirik. Qaldırılan
məsələlər barədə yəqin ki, məktubların
ünvanlandığı orqanlar şərh verib münasibət
bildirəcəklər.
"Azərbaycan
Respublikasının prezidenti İ.Əliyev cənablarına!
Surəti:
"Təzadlar" qəzetinin baş redaktoru Asif
Mərziliyə!
Möhtərəm
prezident!
Bu
müraciətimi oxuyub-oxumayacağınız mənə
bəlli deyil. Amma hər halda keçmiş adamlar İmam
Əbülfəzin adına ərizə yazdırıb axar
çaya atdıqdan sonra imdad gözlədiyi kimi, mən də
bu şikayəti sizə yazıb kömək gözləyirəm.
Mən kaısb kişinin oğlu olmuşam. Öz
fərasətimlə inkişaf edib, rayonda kolxoz
sədrliyinə, Broyler fabrikinin direktorluğuna qədər yüksəlmişəm.
Fabrikdə islahatlar getdikdən sonra uzun müddətdir işsizəm.
İşsiz kimi girdim icra başçısı Taleh Qaraşovun
qəbuluna. Özümü ona təqdim etdim. Dedim mən
qondarma Talış-Muğan respublikası yaratmaq xulyasına düşən
Əlikram Hümbətova qarşı çıxmışam.
1993-cü il 2 iyul tarixində Əlikram Hümbətov
Cəlilabada gəlib, Talış-Muğan respublikasını
artıq qurmuşam dedikdə, mən onun boynundan tutub tribunadan
yerə salaraq, işi pozmuşam. 8 iyul 1993-cü ildə silahlı
qüvvə ilə Cəlilabada glərək,
gecə saat 24
radələrində mənim evimə silahlı, hərbi
geyimli 30-dan artıq hərbiçi ilə basqın edib.
Məni ailə və uşaqlarımın yanında döyüb
qabırğalarımı sındırmışdılar.
Məndən döyə-döyə soruşurdular
ki, Əlikramı tribunadan salan sənsən, mən
isə deyirdim bəli mənəm. Çünki o düz yolda
deyil. Hümbətova qarşı çıxmaqla böyük
Heydər Əliyev siyasətinə dayaq durmuşam və buna görə
də onlar tərəfindən amansızcasına döyülmüşəm.
Bundan sonra 40 gün xəstəxanada yatmışam. Bu haqda
Respublika Prokurorluğunda cinayət işi açılıb,
lakin o iş hələ də başa çatmayıb. Bütün
bunlardan sonra mən həm işimi, həm də mənə
məxsus torpağı itirmişəm.
Mən
Heydər Əliyevin yolunda həmişə hər şeyə
hazır olmuşam. İlham Əliyev cənabları isə
prezident seçilən günü qurban kəsmişəm.
Məni
diqqətlə dinləyən icra başçısı Taleh
Qaraşov çox təmkinlə belə dedi:
-
Sən cəfakeş adamsan. Mən sənə torpaq
verərəm. Amma bilirsən ki, pis zəmanədir. İndi
pulsuz hərəkət etmək mümkün deyil. Burada hazırlanan
bütün sənədlər Bakıda təsdiq olunur. Bu
isə pulla başa gəlir. Sənin də yəqin ki, çox
pula gücün çatmaz, 3000 ABŞ dolları təşkil
et, torpaq şöbəsinin müdiri Füzuli Hüseynova tapşıraram
həll edər. Mənim H.Əliyev siyasətini müdafiə
edənlərə xüsusi rəğbətim var. Nə
qədər bu rayondayam, arxanda durmuşam. Əhsən sənin
qeyrətinə!
Mən
son ümüdim olan maşınımı satıb, 1500 ABŞ
dollarını verdim T.Qaraşova. Bu, 2004-cü ildə olub.
Uzun yazıb nə danışım? Bu söhbətdən düz
iki il keçib, mənə nə torpaq, nə də iş
verən var. Hələ üstəlik məni aldadaraq aldığı
1500 ABŞ dolları məbləğində pulumu da geri ala
bilmirəm. Bunu bilənlər isə mənə gülürlər
və deyirlər bizə baxanda sənin vəziyyətin muşduluqdur.
Bizim Abbasağa adlı bir gözəl şairimiz var idi.
Rəhmətlik yazmışdı:
Kişinin
gündə bu cür
sərvət axırmış cibinə,
Qərq
edir aldığını sanki o,
dərya dibinə,
Hər
şeyin vardır hüdudu, ola bilməz belə ibnə.
Əgər
insafə gəlib, qol çəksə
məvacibinə.
***
Cənab
prezident!
Bu
müraciətimi oxuyub, humanistlik edəcəyinizə
əminəm.
İnanıram
ki, Cəlilabad əhalisi arasında sizə qarşı inamsızlıq
yaradan bir insanı, nəhayət layiq olduğu yerdə
oturdacaqsınız. Son vaxtlar rüşvətxor
nazirlərə layiqli cəzasını verməyiniz hamının
ürəyindəndir. Taleh Qaraşovun da belə aqibət yaşayacağı
günü 85 minlik Cəlilabad əhalisi səbirsizliklə gözləyir.
Sonda
bir şeyi xatırlatmaq istəyirəm. Bizim Cəlilabadın
sabiq icra başçısı Tofiq Bağırovun atasına
heç vaxt rəhmət oxunmayacağını zənn edirdik.
Görünür səhv etmişik. Taleh Qaraşov fikirləşdiyimizi
alt-üst etdi. O, bu rayona ayaq basan gündən bütün
camaat, xüsusən də onurğa sütunu qırılmış
müdirlərin hamısı Tofiqin atasına rəhmət
oxuyur.
Çox
böyük hörmətlə: Məmmədəli BAYRAMOV.
Cəlilabad
rayonu Səttərxan küçəsi, ev 88
***
Azərbaycan
Respublikasının səhiyyə naziri cənab Oktay Şirəliyevə!
Surəti:
Cəlilabad rayon xəstəxanasının baş həkimi
Cavadxan Əliyevə!
Surəti:
"Təzadlar" qəzetinin baş redaktoru Asif
Mərziliyə!
Hörmətli
nazir!
Ərizəmlə
yazıb sizə bildirirəm ki, mən Bağırov Abuzər
Adnaqulu oğlu 1970-cı il 10
sentyabrında Cəlilabad rayonu Seyidbazar kəndində anadan
olmuşam. Ailəliyəm. Dörd övladım var. Heç
bir yerdə işləmirəm. Üç uşağımın
hər birinə ayda iyirmi
yeddi min müavinət alıram.
Özümüz
də çox pis şəraitdə yaşayırıq. Yaşadığımız
yer nəmişli-rütubətli olduğundan tez-tez
xəstələnirik. Xəstəliyimizlə əlaqədar
kənddə yerləşən həkim-ambulatoriyasında müraciət
etməyə bir kimsə tapa bilmirik. Həmin yer çox yararsız
və bərbad haldadır. Rayonun baş həkimi Rəhman Bağırovu
aylarla iş yerində tapmaq olmur ki, dərdimizi deyək.
Nəhayət mən 2005-ci
il oktyabrın 17-də
Cəlilabad rayon xəstəxanasının baş
həkimi Cavadxan Əliyevin qəbuluna düşə bildim.
Şifahi surətdə narazlılığımı bildirdim.
O məni diqqətlə dinlədi və şikayətimə
ciddi yanaşacağını bildirdi.
Tibbi
müayinədən keçməyə ehtiyacım olduğunu
bildirəndə o məni qulaq-burun-boğaz həkimi Ağababa
Ağaverdiyevin yanına göndərdi. Ağaverdiyev məni başdansovdu
yoxlayandan sonra resept yazdı. Məndən 8000 (səkkiz min)
manat pul köçürməyi tələb etdi. Mən ona
pulum olmadığını deyəndə həkim Ağavediyev
resepti məndən aldı.
Hörmətli
Oktay müəllim!
Əli
İnsanov kimi rüşvətxor bir nazirin yerlərdəki
kadrları da təbii ki, özünə oxşayacaq. Bu və
digər xoşagəlməz hallara Cəlilabad xəstəxanasında
hər gün rast gəlmək olur. Əli İnsanovun sadiq
kadrlarının"qayğısı" sayəsində
səhiyyə sistemi rayonumuzda və kəndimizdə çox
pis vəziyyətdədir. Rüşvətxorluq baş alıb
gedir. Adi həkim rayon xəstəxanasının baş
həkimini belə eşitmir.
Sizdən
çox-çox xahiş edirəm ki, mənim bu məktubumu
diqqətlə nəzədən keçirib biz kasıblara qarşı
haqsızlıq edən rüşvətxor, işbacarmaz
bəzi tibb işçilərini cəzalandırasınız.
Qorxulu xəstəliklərin kütləvi halda yayıldığı
bir vaxtda heç bir tədbir görülmür.
Pulumuz
yoxdur deyə heç yerə dərdimizə çarə
edə bilmirik. Əli İnsanovun bu kadrları heç bir
xəstənin pulsuz salamını da almırlar. Buna görə
də xəstəliyimizi müalicə
elətdirə bilmirik.
Hörmətli
Oktay müəllim!
Müstəqil
Azərbaycanın müstəqil vətəndaşı kimi
sizdən artıq dərəcədə xahiş edirəm
səsimizə səs verin. Həyat çox şirindir. Hamı
yaxşı-yaman yaşamaq istəyir. Biz də yaşamaq
istəyirik, ancaq sağlam və gümrah.
İmza:
Bağırov Abuzər Adnaqulu oğlu.
Cəlilabad
rayonu Seyidbazar kəndi"
Baramaqurdu
Əli
İnsanovla Fərhad Əliyevin var-dövlət yığaraq,
həbsxanalara düşməsi baramaqurdunun özünə tor
qurub, sonra isə məhv olmasına bənzəyir
Mərhum
prezident Heydər Əliyevin etimad göstərdiyi
nazirlərdən ikisi YAP-ın və iqtidarın üzünü
qara etdi.
On
ildən çoxdur səhiyyə naziri olmuş Əli İnsanov,
beş ilə yaxın iqtisadi inkişaf naziri işləyən
Fərhad Əliyev heç demə neçə illər imiş
ki, korrupsiya ilə məşğul olurmuş və heç
kimin xəbəri yox imiş. Əksinə, indiyədək
hər iki naziri Heydər Əliyev ideyalarına, prezident İlham
Əliyevə ən sədaqətli məmur hesab ediblər.
Amma...
***
Düzdür,
sabiq maliyyə naziri Fikrət Yusifovun səhlənkarlığı
üzündən (hərə bir ad düşünə
bilər) böyük bir klan və ya mafioz
qrup zərərsizləşdirildi. Məsələn,
Əli İnsanov Məhərrəm Əliyevlə quda idi
və yəqin ki, ikinciyə də zərbə
dəyəcək. Yaxud, Əli İnsanovla Misir Mərdanov yaxın
dost idilər, yəqin ki, Misir müəllim dilxor
ediləcək. Fikrət Sadıqovun başına
gələnlərdən də dərs götürənlər
çox olacaq. Amma daha çox zərbə yəqin ki,
Fərhad Əliyevin qardaşı Rafiq Əliyevin direktoru olduğu
"Azpetrol"la bağlı olanlara dəyəcək.
Çünki "Azpetrol"un hər yanacaqdoldurma
məntəqəsi bir məmurun idi...
***
Düzdür,
hökumət rəsmiləri Əli İnsanovla Fərhad Əliyevin
bu "işini" süni surətdə siyasiləşdirərək
Rəsul Quliyevə bağladılar. Bu da səbəbsiz deyildi.
Çünki əgər bu "işi" öz doğma adı
ilə çağırıb "korrupsiya" damğası
vursaydılar, belə çıxardı ki, mərhum prezident
H.Əliyev görəsən niyə bu təyinatlarda səhv
edib? Yaxud, düşünməyə əsas olardı ki,
əgər H.Əliyevin təyin etdiyi nazirlər qorxu
bilmədən bu qədər xalq malını, dövlət
vəsaitini dağıdıblarsa, gör indi təyin
edilənlər nələrlə məşğuldur?!
***
Hər
halda, böyük dərsdir: Misir Mərdanov üçün
də Kəmaləddin Heydərov üçün də...
Və digərləri üçün də...
Amma
sonda bir məsələni qeyd etməyə bilmirəm. Yadıma
hamının tanıdığı barama qurdu düşür.
Barama qurdu yarpağın ən dadlı şirəsini sorur
və sonra başlayır özünə tor qurmağa.
Nəhayət, bu tor ona qəfəsə çevrilir, axırda
məhv olur.
Düzdür,
barama qurdunun bu hərəkəti xeyirxah məqsəd daşıyır.
Amma çox təəssüf ki, bizim nazirlərin bütün
niyyəti xalqın və dövlətin ziddinə olmaqla,
həm də özlərinin, bütün qohum-dostlarının
axırına çıxmasına hesablanmış olur.
A.MƏMMƏDLİ
Osman
Nəzirov "nəzir" deyibmiş
Amma
kimə, nə üçün, bax bu, Qazax əhli
üçün müəmmalıdır
Bu
yaxınlarda ağzıgöyçəklərdən biri
aləmə car çəkib ki, Osman Nəzirovun "nəzir"
yerini öyrənib. Osman həkim Sərdar Cəlaloğluna
və başqalarına tez-tez qonaqlıq verir. Hələ
evinə də bir neçə dəfə dəvət edib.
Niyyət edib ki, Sərdar Cəlaloğlu yüksək
vəzifəyə gedən kimi "nəzir" paylayacaq.
Bu
əhvalatı bəzi vəzifə sahibləri də bilirmiş.
Nə isə "bir daş altdan, bir daz üstdən"
qoyublar. Biz də Osmanın "nəzir" əhvalatını
eşidən kimi Qazax uşaq xəstəxanasına üz
tutduq.
Osman
həkimlə kabinetində görüşdük. Hiss etdik ki,
həkimi kreslosuna kimsə otuzdurur, kimsə qaldırır.
Çünki həkimin tərpənişi hər şeydən
xəbər verirdi. Telefonun dəstəyini belə qaldırmağı
bir neçə dəqiqə çəkdi.
Osman
Nəzirov özündən çox razı halda:
-
Uzun müddətdir uşaq xəstəxanasına
rəhbərlik edirəm. Heç kəsin "duxu" çatıb
mənə "gözün üstə qaşın var"
deyən olmayıb. Deyənləri də "peşman"
etmişəm. Bir dəfə bir qəzetdə haqqımda
tənqidi məqalə getmişdi. Canım-ciyərim, arxa-dağım
Əli İnsanov mənə dedi ki, heç kefini pozma. Acığa
mənə əməkdar həkim adı verdi. Hamının
pisliyi özünə qaldı.
...Bizə
aydın oldu ki, Osman Nəzirov keçmiş səhiyyə
naziri Əli İnsanova arxayın olub "qaz vurub-qazan doldurur".
Odur ki, Osman həkimin kabinetini tərk edib, jurnalist araşdırmasına
başladıq. Xəstəxanadan 100-dən çox işçidən
yalnız 36 nəfərini görə bildik. Adının
çəkilməsini istəməyən bir nəfər dedi:
-
Qardaş, vallah, elə işçilər var heç üzünü
görmürük. Elələrini yalnız baş həkim
Nəzirov özü tanıyır. Yalandan sənədlər
yazılır ki, guya filan qədər xəstə uşaq var.
Buyur, palatalara bax. Vur-tut bu gün ikicə nəfər
xəstə var. Amma kitabda 16 nəfərdir. Sizcə, bu
palatalarda xəstə dura bilərmi? Xəstəxananın
texniki işçilərinin, mətbəx işçilərinin
nə iş gördüyünü deməyə adamın dili
gəlmir. Bax, o otaq guya mətbəxdir.
...Otağa
baxanda təəccübləndik. Həmin mətbəx
deyilən yerdə 5-6 ədəd qab-qacaq, bir ədəd işləməyən
qaz pilətəsi vardı. Qalan otaqların nə ilə qızdırıldığını
heç kəs cavab verə bilmədi. Bir sözlə,
həmin xəstəxanada heç bir xidmətdən danışmağa
dəyməz. Əli İnsanovun müdafiə etdiyi
Nəzirovun rəhbərlik etdiyi xəstəxanada yaxşı
nə görə bilərdik ki?
Qəribədir
ki, 75 yaşlı Osman həkimin hələ könlündən
yuxarı vəzifələr də keçirmiş.
Maraqlıdır,
özünü güclə idarə edən Osman həkim
xəstələri necə müayinə edir?
Düşündüyümüz
bu suala özümüz cavab verməli olduq. Deyənlər oldu
ki, O.Nəzirovun müalicə etdiyi xəstələrin
əksəriyyəti şikəst olub. Xəstə ölüm
ayağına düşəndə sahibini çağırıb
deyir: "Tiflisdə, Bakıda yaxşı həkim dostlarım
var. Xəstəni təcili oraya aparın".
Belə
bir el məsəli var. "Suda boğulan saman çöpündən
yapışar". Yazıq xəstə sahibləri də
O.Nəzirovun şirin dilinə aldanıb ondan imdad diləyir.
Axırı da puç olur. Osman həkim ona görə
belə edir ki, ölüm hadisəsindən kənarda qalsın.
Qalır da...
Bir
sözlə, Osman həkim çox anaların gözünü
yaşlı qoyub.
Xəstəxananın
girişinə nəzər salanda bizi vahimə basdı.
Xəstəxananın binasına bitişik maşın
təmiri sexlərinin kimə məxsus olduğunu öyrənməyə
cəhd etdik. Dedilər ki, Osman həkimlə razılaşıblar...
(Ardı
var)
Vəkil RÜSTƏMLİ