Əsirlikdən
azad edilmiş əsgər indi də həbsxanaya düşüb
Əsgər
Xəyal Abdullayevin qoca nənəsi redaksiyamızdan kömək
istədi
Ermənilər
tərəfindən əsir götürülmüş
üç əsgərimiz may ayının 7-də Qırmızı
Xaç Cəmiyyətinin xətti ilə Azərbaycanın
aidiyyəti orqanlarına təhvil verildi, amma...
Həmin
əsirlərdən biri, 1986-cı il təvəllüdlü
Abdullayev Xəyal İdris oğlunun ailəsindən verilən
məlumata görə, onlar buraxıldıqdan bir neçə
gün sonra Tərtər rayonundan tanımadıqları bir müstəntiq
evlərinə zəng vuraraq bildirib ki, X.Abdullayevin işi
məhkəməyə verilib və işə onun
tərəfindən baxılacağı üçün onlar
mütləq Tərtərə gəlməlidirlər.
Xəyalın
qoca nənəsi 73 yaşlı Səhərgül Abdullayeva (anası
Azərbaycanda yaşamır) Tərtər rayonuna gedir, lakin heç
kimdən nəvəsi haqqında məlumat əldə edə
bilmir. Belə olan təqdirdə, onlar yenidən sorğu
üçün Qırmızı Xaç
Cəmiyyətinə müraciət ediblər.
Cəmiyyətdən onlara bildiriblər ki, onlar üzərlərinə
düşən missiyanı yerinə yetiriblər və
əsirləri Dövlət Komissiyasına təhvil veriblər.
Dövlət
Komissiyasından isə Xəyal barədə məlumat almaq
istədikdə isə, onlara məsləhət görüblər
ki, Müdafiə Nazirliyinə müraciət etsinlər.
Müdafiə
Nazirliyinin mətbuat xidməti ilə əlaqə saxlayan
nənəyə bildiriblər ki, əsgərləri göndəriblər
xidmət etdikləri hərbi hissəyə.
Ancaq
on gün əvvəl tanımadıqları başqa bir adam (həbsxanada
olan uşaqlardan birinin valideyni) onların evinə
gələrək bildirib ki, Xəyal Gəncə həbsxanasında
yatır və ailəsinin ona ərzaq, yataq ləvazimatı göndərməsini
deyib. Xəyalın nənəsi Gəncə həbsxanasına
gedir, lakin nəvəsi ilə görüşməyə
icazə verilmir.
Nənəni
narahat edən odur ki, nə üçün Xəyalın
həbsxanada saxlandığını ona xəbər
verməyiblər?
Xəyalın
ailəsinin məlumatına görə, uşaqlar həbsxanada
işgəncələrə məruz qalıb, hətta yoldaşlarının
birinin bədəninə siqaret basılıb.
Belə
olan halda, Xəyalın nənəsi uşaq barədə
yenidən məlumat almaq məqsədilə Müdafiə
Nazirliyinin mətbuat xidmətinin əməkdaşı İlqar
adlı şəxslə əlaqə saxlayıb, cavab isə
belə olub: "Siz narahat olmayın. Həmişə
əsirlikdən qayıdanların qarantin müddəti olur".
İyunun
1-də isə yenidən xəbər gəlib ki, Xəyalı
Bakıya gətiriblər. Nənə Müdafiə Nazirliyinin
mətbuat xidmətinə yenidən müraciət etdikdə yaşlı
qadın kobudluqla üzləşib. Ona bir nəfər bildirib ki, o, heç
kimə hesabat vermir.
Qoca nənənin sözlərinə görə,
Xəyalın atası Qaradağ həbsxanasında oğlunun
nahaqdan tutulmasına etiraz əlaməti olaraq aclıq aksiyası
keçirib və hətta orada xəstəxanada yatıb.
Nənənin dediyinə görə,
Xəyal Abdullayev əqli cəhətdən zəif olduğu
üçün onu Gəncədəki 41 saylı
məktəbin direktoru vaxtı ilə 1-ci sinifdən çıxarmış
və onlara uşağı 45 saylı əqli
cəhətdən zəif uşaqların təhsil aldığı
məktəbə aparmalarını tövsiyə etmişdir.
Lakin Xəyalın anası əri məhkum olduqdan sonra Moskvaya
getmək məcburiyyətində qalıb. Xəyal isə orta
təhsil almayıb və oxuyub yazmağı da bacarmır.
2004-cü ildə Azərbaycana gələn Xəyal əqli
geriliyi olmasına baxmayaraq (lakin əvvəllər ailə
həkimə müraciət etmədiyi üçün
Xəyalın həkim arayışı yoxdur), onu hərbi
xidmətə aparıblar.
Artıq neçə vaxtdır ki, Xəyalın
qoca nənəsi hər gün nəvəsinin axtarışına
çıxır, lakin aidiyyəti orqanlar ona heç bir
dəqiq məlumat vermir, onu yollarda süründürürlər.
Xəyalın nənəsi nəvəsinin erməni
əsirliyində olarkən onun barəsində vaxtlı-vaxtında
məlumat aldığını, lakin öz
vətənində isə Xəyalın heç bir günahı
olmadan həbs edildiyini və dəqiq yerinin bilinmədiyini söyləyir.
Nənə nəvəsini əsgəri xidmətə yola saldığı
üçün çox peşman olduğunu da bildirir.
Təqaüdlə güclə dolanan
nənə artıq nəvəsi haqda məlumat almaq
üçün nəqliyyata yol pulu belə tapmadığını
dilə gətirdi və redaksiyamızdan kömək istədi...
M.HÜSEYN
P.S. Qoca nənəni qapılara salan Müdafiə
Nazirliyi nə üçünsə hələ də susur...
Susmaq isə bu dəfə heç də qızıl yox, Qırmızı
Xaç Cəmiyyətinin tez-tez ermənilərdən geri aldığı
çoxsaylı Azərbaycan əsgəri deməkdir. Bu
əsgərlərdən biri də Xəyal Abdullayevdir. Hansı
ki, komandirinin mürgüsü ucbatından əsir düşüb.
Bu lap ona bənzəyir ki, canavar sürüdən bir quzu oğurlayır,
amma çobanı yox, quzunu ittiham edirlər...
Ekologiyaya
zərbə endirilir
Təbiətə qayğı,
ekoloji cəhətdən qorunub-saxlanması həmişə dövlətin
başlıca məqsədi olub. Təəssüf ki, respublikanın
əksər bölgələrində sağlamlığımız
xətrinə yaşıllığı artırmaq, o cümlədən
təbiəti göz bəbəyi kimi qorumaq əvəzinə
ona ikiqat zərbə endirilir.
Buraya Ekologiya və Təbii
Sərvətlər Nazirliyinin 2 saylı ərazi üzrə
ekologiya və təbii sərvətlər şöbəsinin
əhatə etdiyi Qazax, Ağstafa, Tovuz, Şəmkir və
Gədəbəy rayonları daxildir.
Qeyd edək ki, şöbəyə
vaxtilə sözügedən nazirliyin işçisi olmuş
Rafael Quliyev rəhbərlik edir. Həftənin dörd gününü
şöbənin Qazaxda yerləşən iş yerində,
üç gününü isə Bakıda keçirən
R.Quliyevdən hansı işin keyfiyyətini soruşmaq olar?
Adları çəkilən rayonlarda, xüsusilə
də Qazaxda qanunsuz kəsilən ağaclar, şəhəri tüstü-dumana
bürüyən gəc sexləri, görəsən, Rafael
Quliyevin hansı müsbət işindən xəbər verir?
Başı şöbədəki işçilər arasındakı
çəkişmələrə qarışan, dedi-qodulara
maraq göstərdiyi üçün təbiəti tamamilə
unutmuş R.Quliyevin zəbt etdiyi vəzifənin sükanını
itirməsi çoxlarını narahat edir.
Görünür, bu məsələnin
yoluna qoyulması üçün ekologiya və təbii
sərvətlər naziri cənab Hüseyn Bağırovun
şəxsən özünün məşğul olması
vacibdir.
Bəlkə ondan sonra rayonlarımızın
təbiətinə işıq düşə...
V.RÜSTƏM
Qəhrəmanın
xatirəsi anılmadı
Qazax avtovağzalının
qarşısında qoyulmuş Müseyib Allahverdiyevin
əzəmətli büstü həmişə diqqəti
cəlb edir. O, Qazax və Ağstafa rayonlarının yeganə
Sovet İttifaqı Qəhrəmanıdır
Qeyd edək ki, Müseyib Allahverdiyev 1936-cı
ildə hərbi siyasi məktəbi bitib, Böyük
Vətən müharibəsində batalyon komandiri olub. Müharibədə
göstərdiyi şücaətlərə görə 1945-ci
ildə sağlığında Sovet İttifaqı
Qəhrəmanı adına layiq görülüb. Amma...
Təəssüflər olsun ki, faşizm
üzərində qələbənin 60 illiyi münasibəti
ilə nə hər iki rayonun rəhbərliyi, nə də
qəhrəmanın qohum-əqrəbası
tərəfindən büstün önünə bir
dəstə çiçək belə qoyulmadı. Büstün
ətrafına qulluq etmək isə demək olar ki, tamamilə
unudulub. Hər gün büstün yanından keçənləri
həm qəhrəmanın yaxınlarının, həm də
aidiyyəti təşkilatların Sovet İttifaqı
Qəhrəmanı Müseyib Allahverdiyevin xatirəsinə
etinasızlığı düşündürür...
Vəkil RÜSTƏM
Bələdiyyə
sədri peşman etdi...
Həmkarım Vəkil Rüstəmin
rəhbərlik etdiyi "Fakt+Fakt" qəzetinin yaxın
ötən sayında dərc etdiyi "Vahid Bankın fırıldaqçı
varisi indi nəyin varisi olmaq istəyir?" məqaləsini
bəlkə də oxuyub, heç cavab yazmazdım. Ancaq onun haqlı
olaraq Qazax Bələdiyyəsinə ötən il Ruslan
Həsənəli oğlu Xasayevin sədr seçilməsində
məni günahkar bilməsi, bir neçə söz
deməyimə vadar etdi.
(Əvvəli 28 may tarixli yazıda)
Qazax Bələdiyyə sədri Ruslan
Xasayevin işlədiyi beş ay müddətində Qazax
əhalisinə etdiyi xidmətlərə nəzər salanda,
onun ancaq özünə və özü əqidədə
olanlara köməyindən savayı bir şey görmürsən.
Doğrudan da, adamın görmədiyi günə
düşməsi yaman olurmuş. Özünü elə aparır,
elə hərəkət edir ki, heç elə bil paltarları
yaşadığı evin qabağında həyat yoldaşı
tərəfindən yandırılan Ruslan deyil. R.Xasayevi görkəmə
salan əsas pul mənbəyi vaxtilə Azərbaycanda maxinasiya
yuvalarından olan "Vahidbank"ın Qazax filialı olmuşdur.
Bu, rayon camaatına daha yaxşı məlumdur. Belə ki, yazıq
yetim-yesir uduzsa da, gözləri bu gün də arxasında
qalan pullarla, qazanan Ruslan bəy oldu. Qırmızı Körpüdəki
bazara, şəhərdəki yük maşınları
avtobazasının həyətində böyük bir un
dəyirmanına şəriklik, neçə-neçə
ticarət obyektlərinə sahiblik, yaşadığı
imarətin yenidən tikilişi ilə ətrafdakı mağazaları
sıxışdırıb ləğv etdirmək, gündə
bir minik avtomobili dəyişmək kimi, eyni zamanda xoşagəlməz
digər məqsədlərə nail oldu.
Qəribədir ki, Qazax əhalisinin "Vahidbank"da
milyonlarla vəsaitini mənimsəyən, onlara göz yaşları
bəxş edən Ruslan Xasayev mühakiməsiz-filansız
rayon əhalisi içərisindədir. Bu cür pislikdən
sonra onun Qazax Bələdiyyəsinə hansı yolla seçilməsi
(üstəlik, sədr) də şübhə altına alınır.
Ruslan bəy həm də torpaq zəbt etməkdə pərgar
şəxslərdəndir. Bəlkə də o, bunun qanunları
yaxşı bilməməsindən irəli gəlir.
Çünki qanunları yaxşı bilsə bu cür "riskə"
getməz.
Qarşımdakı sənəd
dediklərimizi açıqca təsdiq edir. Həmin
sənəddə vaxtilə Qazax rayon Zəhmətkeş
Deputatları Soveti İcraiyyə Komitəsinin avqust 1977-ci il,
17 saylı protokolunda məsul şəxslərin imzası
ilə Qazax rayon istehlak cəmiyyətinə yeni tipli
yeməkxana binası tikilməsi üçün Tbilisi-Qazax
şosse yolu ilə yanacaq doldurma məntəqəsi arasında
olan "Qafqaz" sovxozunun istifadəsiz torpağından 3
hektar ayrılmasına qərar verilir. Qərara uyğun
həmin yerdə böyük bir restoran ("Qarabağ")
tikilir.
Bəli, bu, 1977-ci ildə baş verir.
Bəs Ruslan Xasayev bələdiyyə sədri seçildikdən
sonra restoran nə ilə qarşılaşır? Əlbəttə
ki, vəzifəyə qərəzli, şəxsi maraqlarını
həyata keçirməyə, çoxlarının çoxdandır
ki, çırağını söndürməyə can atan
Xasayevin qəzəbi və "təmiz ürəyi"
ilə. Restorana ayrılmış 3 hektarın (tikinti qalmaqla)
ətrafını zəbt etməyə başlayır. Soruşanda
da, bildirir ki, "həmin qərar köhnə şeydir,
ləğv edilib, mən bu yeri sabiq icra başçısı
Əsəd Orucovun göstərişi ilə torpaq şöbəsinin
müdiri Vaqif Qocayevdən almışam".
***
Bu da onun cavabı. Buradan belə çıxır
ki, həmin ildə verilmiş qərarlar etibarsız sayılır.
Üstəlik, Ruslan Xasayevin "ev-eşiyi də". Nə
olar, atalar demişkən: "Dəvədən böyük
fil də var".
Yəqin ki, bu işlə Qazax rayon
Məhkəməsi bacarmasa, başqa məhkəmələr
məşğul olacaq. Tezliklə bu cür özbaşınalıqlara
və vəzifədən sui-istifadə hallarına xitam
veriləcək.
Araşdırmalardan bəlli olur ki, R.Xasayev
Qazaxda naməlum səbəbdən dillərə düşmüş
"xeyriyyəçilik"dən çox pisliklə məşğuldur,
həm də yalnız özünə kölgə salandır.
Artıq deyilənlərə görə, irili-xırdalı
bir neçə sahələrə özününkülərini
qoymaqdadır. Maraqlıdır ki, vaxtilə hazırkı hökumət
rəhbərlərini "baltalayan" Qazax
Bələdiyyə sədri Ruslan Xasayev gələcək
üçün indi hansı planlar cızır? Hər gün
yatıb-duranda yeni "yaxşılıqlar" barədə
düşünür?
***
Gəlin tələsməyək.
Bələdiyyə sədrinin beş ay ərzində gördüyü
işləri nəzərdən keçirərək,
yenidən atalar sözlərinə istinad edib hələlik
fikirlərimi belə tamamlayıram: "Yaman günün ömrü
az olar".
İlham HACALI
Növbəti Gülməmməd
Məmmədov oldu
Ədliyyə Nazirliyi
Məhkəmə Qərarları İcrası Baş İdarəsində
son zamanlar baş verən islahatlar əfsuslar olsun ki, yalnız
kadr dəyişikliyi ilə məhdudlaşır
Belə ki, burada ən çox cibini
dolduraraq qohumbazlıq edən Aydın Qasımov işdən
azad edilib, idarə rəisinin maliyyə və təsərrüfat
işləri üzrə rəis müaivni polkovnik Gülməmməd
Məmmədovun işində qalması çoxlarını
təəccübləndirdi. Lakin görünür ki,
kimlərsə Gülməmməd bəyin
fəaliyyətinə həqiqətən də qanun çərçivəsində
nəzər yetirə biliblər.
Mətbuatın "dostu" olan, bir faktı
gizlətmək üçün 2000 ABŞ dolları
tərləyən Gülməmməd müəllimin işdən
çıxması ayda bir dəfə ona baş çəkib
aylığını alan bəzi qəzet təsisçilərinin
bazarını bağladı. Vaxtilə "Tender" oyunları
ilə bir qəzet təsisçisi tərəfindən şantaj
olunan Gülməmməd bəy axır ki, rahat nəfəs ala
bilər. Daha həmin qəzet təsisçisi Gülməmməd
bəyi "sən məhbusların ərzaq və digər
təminatları üçün dövlət büdcəsindən
ayrılan vəsaiti mənimsəyirsən" - deyə
hədə-qorxu gəlib ondan ayda 300 ABŞ dolları ala
bilməyəcək. Çünki əlaqədar təşkilatlar
özü bu qanunsuzluqları aşkarladı. Sən demə, Gülməmməd
Məmmədov məhbusları yararsız ərzaq məhsulları
ilə təmin edirmiş. Öz aramızdır, bəs
həmin qəzet təsisçisinə o verdiyi pulları hardan
tapaydı? Elə bilirsiniz ki, şantaj olunan təkcə Gülməmməd
Məmmədov idi? Yox, bazanın rəisi Cavanşir də
onunla birlikdə şantaja məruz qalmışdı.
Gülməmməd Məmmədov
Azərbaycandakı həbsxanaların ərzaq, geyim və s.
təminatları ilə bağlı keçirilən
tenderlərdə vəzifəsindən sui-istifadə
edərək öz qohumlarını, əsasən də oğlunu
qalib elan etmişdi. Əslində Aydın Qasımovun belə işlərdə
heç əli də yox idi. O, sadəcə olaraq işlədiyi
sahədə öz qohumlarını işlə təmin etmişdi
ki, işdən çıxandan sonra qohumları da
ədliyyə sistemindən qovuldu.
Gülməmməd Məmmədovun oğluna
məxsus olan "Pak-Xəzər" firması isə hər
il qalib elan olunurdu.
Gülməmməd Məmmədov işindəki
ciddi qüsurlara görə işdən azad edildi. Amma öz
aramızdır, onsuz da bu işdə saçını ağartmış
Gülməmməd bəy heç nə itirmədi,
əksinə, zəli kimi ondan hər ay pul qopararaq oğlunun adını
hallandıraraq pul qoparan bəzi qəzet təsisçilərindən
canı qurtardı.
Çinarə
VÜQAR